Gosti: 2
Ala ludega svita. Ma nikako ne mogu razumit ovi Naš svit koji je infiša u balun i 'Ajduka ma more in krešit letrika,kruv,ma duvan in more krešit,ma bilo koja dežgracija more pogodit ovega našega čovika ma sve je to pizdarija ,sitnica prema padu 'Ajduka na ovoj našoj fuzbalskoj burzi.
Jebe se ovi naš svit kako na onoj financijskoj burzi stojidu ''škver i kaštelanski staklenici''kako posluju Kerumova i Svagušina poduzeča njih zanima jedino fuzbalska burza oiliti tablica i kako na njoj 'Ajduk stoji.Kad gre naopako onda vidimo kordone policijoti prid Poljudon,a ko je ikad vidija da ovod u nas policijoti čuvadu ma njanci banke i kladionice koje jedine imaju pinez ,eee njanci nji ne čuvadu,vridnije i zaštičenije su 'Ajdukove prostorije vengo svo blago iz svih naših crikvi i muzeji .
Isukrsta mi nije dobro,nikako ni dobro,vrije u Splitu ,užgala se cila Dalmacija i inšoma izgubi li se još koja utakmica moglo bi bit vraga paklena ,ma prava barufa bi mogla nastat,ma sve se na noge diglo ,eto inšempjani penšjunati po šentadan sidu i u ruci sa lapišen,misto konti kako da misec izađu sa ono bokun pezije oni računadu more li 'Ajduku Europu igrat koliko skin če bodi osvojit ma more li do kraja i prvak biti,ma govorin van ja ,poludija je dekapoto ovi naš svit,a di i neče kad ovi Naš 'Ajduk nikoga na svitu ne more tuč ma za gospu blaženu pošteni gol ne more zabit,a kad se ono igrači kupujedu,a novine pune hvale ovi naših zvjezda sve sama čuda od igrači,alaga koji su to potencijali svi oma u reprezentaciju mogu igrat ,a kad ih se proda onda nigdi vanka u ozbiljnim ligama ne mogu igrat.
Jo koje smo mi mone,ma ništa mi ne razumimo , ni slobodno novinarstvo,a ni liberalni kapitalizam ča oče reč da novinari mogu pisat ibez ikakve odgovornosti,a ''gazde''mogu činit ča očedu ,mogu arčit koliko očedu ,jebe in se 'ol materinu dotu arče ,nek naprave duga koliko god moredu za ništa odgovarat neče,nikor in ništa ne može.
ma neču više, zdravi i veseli bili - lipi moji
Ljubo Rus Dujmov
10.09.2010.
